Sulat ni Mdpn. Dwight Ian Onglatco
Mga Laragway ni Mdpn. Cyrus Calubayan

Napun-an sang misteryo kag mahika ang covered court sang John B. Lacson Foundation Maritime University (Arevalo), Inc., sa ginhiwat nga Ugyon Marino 2026 kahapon, Agosto 14, 2026.

Nakasentro sa mga dyos, dyosa, engkanto kag iban pa nga mga elemento ang konsepto sang selebrasyon sa tema nga "Awakening the Spirit of Legends: United by Heritage, Rooted in Culture."

"Organizations do not only exist to plainly form a group or plainly prepare for events, they are expected to be and remain significant," hambal ni Mr. Robert O. Parcia, MSMM, Administrator, kun sa diin iya ginpabutyag ang importansya sang responsibilidad kag papel nga ginagampanan sang kada organisasyon.

Kabahin sang selebrasyon ang nanarisari nga mga kompetisyon pareho sang Flash Mob, Pasundayag, Pahampang, Kahoot Marino kag Merkado Marino nga nagsugod sang aga.

Nagpatigayon naman sang “Wanna Be!” ang pinakabag-o nga gindugang sa lista sang mga aktibidad sa hapon, samtang ang Club Icon kag Foam Party sa kagab-ihon.

Madinalag-on ang Polaris Organization matapos nga ideklarar bilang Overall Champion halin sa sobra 15 ka mga organisasyon nga nag-intra, kag ginsundan naman sang Community Extension Services Society (CESS) kag Capiz Sailors’ Association (CSA) para sa sumunod nga ikaduha kag ikatatlo nga puwesto.

Ang tuigan nga Ugyon Marino ginahiwat sa bulan sang Agosto agud mapakita kag mapabutyag ang nagkalain-lain nga talento kag abilidad sang kada organisasyon.

Makit-an man sa amo nga kahiwatan ang ila positibo nga pagsambuwa sa mga aktibidad nga ginpangunahan sang Supreme Student Government (SSG), Student Executive Council sang College of Maritime Education (SEC-CME), College of Criminal Justice Education (SEC-CCJE), kag Supreme Student Learners Government (SSLG) sang SHS Department.

Ini nga kahiwatan sang buluthuan ang nagapakita lamang sang panaad nga panata sang unibersidad sa mga masunod nga United Nations Sustainable Development Goals (UNSDGs): Good Health and Well-being (SDG 3) kag Partnerships for the Goals (SDG 17).

#TheDolphin